ភ្នំពេញ៖ ព្រះមហាក្សត្រ និងសម្តេចព្រះមហាក្សត្រី ទ្រង់ទាំងទ្វេ បានយាងមកដល់មាតុប្រទេសវិញនៅរសៀលថ្ងៃទី១៦ ខែមីនា ឆ្នាំ២០២៣ ប្រកបដោយសុវត្ថិភាព ក្រោយទ្រង់ទាំងទ្វេបានយាងទៅពិនិត្យព្រះរាជសុខភាពនៅទីក្រុងប៉េកាំង ប្រទេសចិនអស់រយៈពេល ១ខែកន្លងទៅ។
ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ទ្រង់ស្តេចយាងទៅពិនិត្យព្រះរាជសុខភាពនៅរដ្ឋធានីប៉េកាំង សាធារណរដ្ឋប្រជាមានិតចិន កាលពីថ្ងៃទី១២ ខែកុម្ភៈ ឆ្នាំ២០២៣។
ជាទូទៅព្រះមហាក្សត្រ និងសម្ដេចព្រះវររាជមាតាជាតិ តែងយាងទៅប្រទេសចិនពិនិត្យព្រះរាជសុខភាពជាទៀងទាត់ ២ដង ក្នុង១ឆ្នាំ។
គូសបញ្ជាក់ថា ព្រះមហាក្សត្រនៃកម្ពុជា នឹងយាងជាព្រះរាជាធិបតី ក្នុងព្រះរាជពិធីសុំភ្លើង «ព្រះអគ្គីកីឡា» នៅប្រាសាទអង្គរវត្ត នាថ្ងៃទី២១ ខែមីនា ឆ្នាំ២០២៣ ដែលជាពេលវេលាដ៏ល្អ ព្រះអាទិត្យរះចំពីលើកណ្តាលកំពូលប្រាសាទអង្គរវត្ត ដើម្បីរៀបចំធ្វើជាភ្លើងគប់រត់នៅខេត្តសៀមរាប និងបណ្តាប្រទេសក្នុងតំបន់អាស៊ាន សម្រាប់ស៊ីហ្គេមលើកទី៣២ ឆ្នាំ២០២៣៕
